Son Juan Carlos Asorey, fotógrafo especializado en arquitectura, interiorismo e paisaxismo. A miña finalidade é capturar a esencia de cada espazo, convertendo en imaxes a visión de arquitectos, deseñadores, construtores e profesionais que buscan destacar o seu traballo.
Para min, a fotografía non é só documentar, senón crear unha experiencia visual que resalte os detalles, a luz e a atmosfera de cada proxecto. O meu obxectivo é poñer en valor a calidade e a identidade de cada espazo, cunha estética coidada e profesional.
Traballo con arquitectos/as, interioristas, paisaxistas, axencias inmobiliarias e profesionais de sectores como a construción, a hostalaría ou o turismo. Se buscas imaxes que non só transmitan a esencia do teu proxecto, senón que tamén reforcen a túa marca e a túa presenza no mercado, estou aquí para axudarche.
Algo máis persoal
Nacín en Caracas (Venezuela), aínda que levo en Galicia desde moi cativo. Resido na Estrada, unha vila da provincia de Pontevedra a só trinta quilómetros de Santiago de Compostela .
Son dos que pensa que hai que ser serio e rigoroso no traballo pero tamén que hai que intentar levar a vida cun chisco de humor.
Entre as miñas afeccións destacaría a lectura, a música, a xardinería... E encántanme os animais, sobre todo os cans.
Valoro moito a familia, a propia e tamén a que elixes.
Falo galego (maiormente), castelán e enténdome ben co inglés.
Encántame retratar lugares abandonados ou en ruínas, así como a fotografía de natureza e paisaxe, sexa esta natural ou urbana.
Da serie de abandonos "A casa do cura"
Paisaxe urbana (A Guarda, Pontevedra)
Paisaxe natural (Praia de Lires, Cee, A Coruña)
Pasado e presente na fotografía
A miña relación coa fotografía vén desde neno. Na nosa casa sempre foi habitual ter e facer fotos familiares de todas as épocas. E isto, tendo en conta que non contabamos con teléfonos intelixentes nin cámaras dixitais como na actualidade, creo que ten o seu mérito. A este respecto, dicir que a primeira persoa que fixo que isto fose posible foi meu pai, referente e instrutor para min no mundo da fotografía. El regaloume as miñas dúas primeiras cámaras fotográficas, obviamente, analóxicas.
En calquera caso, non fun consciente por aquel entón de que a fotografía significaba para min moito máis que unha afección. De feito os meus estudos iniciais foron pola rama da electrónica, algo do que xamais cheguei a traballar. Anos máis tarde, empecei a ter claro que o meu futuro pasaba polo mundo da imaxe. Isto levoume a cursar estudos de edición e montaxe de vídeo, de deseño gráfico (especialidade na que son Técnico Auxiliar) e, finalmente, de fotografía, especializándome na fotografía de arquitectura.
Traballei como fotógrafo de prensa durante varios anos, un traballo que me reportou experiencia e bagaxe en diversas especialidades fotográficas. Actualmente tamén colaboro con varias axencias de fotografía de stock como Shutterstock, Getty Images ou Adobe Stock, entre outras.
Meu pai tamén foi un gran apaixonado desta materia e, nun momento da súa vida, non dubidou en formarse e estudar fotografía, o que lle permitiu traballar nun dos laboratorios fotográficos máis importantes de Caracas por aquel entón.